أنا بحب زئردة أوي. كتبت قبل كده عن قد إيه هي مش قطة درامية. ورغم إن بداية حياتها كانت صعبة، بس هي قطة معافرة وبتتأقلم وبتعيش. زئردة مستمرة تعلمني وتديني دروس في الدنيا. لما حصل تغيير كبير في حياتها، وحياتي. هي بتعلمني إزاي أتعلم أنبسط بالموجود واتأقلم بسرعة وأشوف الإيجابي في الوضع وما أقفش كتير أدبدب في الأرض وأعترض على التغيير وأخاف منه. لما قارنت تصرفها / تأقلمها وتقبلها وقد إيه دا هون عليا وحسيت إني بحبها أضعاف، بغضب ابني واحتجاجه وخصامه ليا وخوفه لدرجة إنه بيترعش حسيت إني بتعلم أنا نفسي درس.
لأني أنا فاهمة إيه اللي بيحصل ومبرراته، واخترت لهم الأحسن، فشايفة خوف ابني (رغم إني متفهماه) أكتر بكتير من الموقف. مشفقة عليه واعتذرت له كتير، بس عايزة أقوله ونفسي يفهمني وأنا بقوله إن دا أحسن ليكم، وإن الوضع دا فيه مميزات كتير وإن التغيير اللي هو شايفه مرعب دلوقتي، بعدين هيحس إنه كان كويس. رغم إنه مجاش بمزاجه. لقيت نفسي وأنا بقوله دا في دماغي بقوله لنفسي. بقول لنفسي التغيير اللي انتي شايفاه مرعب وغضبانة بسببه دلوقتي هو أحسن لك. مش مستاهل الخوف دا كله. حاولي تشوفي مميزات الموضوع زي زئردة. دا هيسهل عليكي حياتك، وعلى اللي حواليكي كمان.
بقول دا لسارة الخايفة والغضبانة جوايا. وبتمنى من قلبي تستوعبه وتتقبله أسرع. رغم كل ألم.
فكرة إن "الحياة ما بتقفش" على قد ما هي فكرة مطمئنة إن كل حاجة بتعدي على قد ما بتحسسني بغضب مش مفهوم. بحس إن أكتر حاجة تحسس اللي بيعدي بوقت صعب بوحدته وحزنه هي إنه بيكون شايف الحياة حواليه ماشية عادي جدًا ومفيش ولا حد حاسس إنه متألم. محدش واخد باله من حاجة.
عندي كراهية خاصة للخروج في البلكونة وقت المغرب في رمضان، لأني مش قادرة أتجاوز إحساسي من سنين طويلة وأنا غرقانة في التعاسة وبشوف البيوت حواليا كلها "تبدو" سعيدة جدًا ومش حاسة بحاجة. لما كبرت فهمت إنه مش شرط يكونوا سعداء، وإنه دا إحساس مبالغ فيه بالذات إني أبقى عايزة الدنيا تقف لحزني، أو تشاركني فيه. بس مش قادرة أنسى شعوري دا بالسخط إني تعيسة جدًا وخايفة ومحدش حاسس بدا.
لما بشوف صور أسود بتطارد غزلان، بوستس عن حيوانات بتتعذب في معامل تجارب، مآسي حرب مفزعة، بحس قد إيه الحياة قاسية أوي أوي وأقسى ما فيها إنها لازم تستمر! وإن كل واحد فيه اللي مكفيه.. أنا نفسي بدور وشي وا SKIP الحاجات دي عشان مش هقدر أساعدهم ومش هقدر أعيش بوجعهم ومش هقدر أتحمل كل وجع العالم دا!
وأنا بكتب دلوقتي افتكرت المشهد دا من Green mile
