حاسة إني محتاجة أعيط أو أصوت ومش عارفة اعمل كده. معنديش رفاهية إني أعمل كده.
السنة اللي فاتت زي دلوقتي بردو كان وقت رخم، وعديت بعده على وقت أصعب وكنت حاسة إني بلف في دوامة ومعنديش أي رفاهية إني أقف حتى وأقول إني تعبانة. لما قررت أحط نفسي تحت ضغط كنت بأهل نفسي نفسيًا لدا، قلت لنفسي إني هتعب شوية وإني هكون مضغوطة ومعنديش وقت وتوقعت إني أنهار شوية وأقوم تاني عادي. بس الحياة بتعلي عليا بشكل فاق توقعاتي بصراحة لدرجة حاساها جنونية.
معرفش الحاجات كبيرة عليا ولا كبيرة عموما ولا مش كبيرة ولا حاجة وأنا اللي مضخماها. بس عارفة كويس إني تعبانة أوي ونفسي أسند ضهري أوي !
لما الكوابيس اتأخرت أنا قلقت. اتضح إن عقلي لسة كان بيعالج الموقف وبيحضر لي شوية كوابيس على ذوقه!
عندي غضب مش عارفة أوصفه ولا أشرحه لحد. فكرة إنه دا الوضع ودا الأمر الواقع ودا اللي بيحصل ما بيقللش غضبي نهائي.. فكرة إنه يمكن خير ما بتقللش غضبي بردو.
من كام يوم كنت كاتبة تعليقا على بوست قريته إن "الدبدبة ورفض اللي مافيش مفر منه بيخلونا نعاني مرتين وكتير بنضيع حاجات كانت ممكن تخلي الرحلة تهون شوية لأننا مركزين بس في رفض تقبل اللي عايشينه"، بس أنا مش قادرة ما أدبدبش هنا ودلوقتي وأحس إني غضبانة جدا حتى لو دا خلاني أعاني أكتر لأني فعلاً غضبانة.. وحتى لو حصلت حاجات إيجابية نتيجة دا أنا غضبانة
أملي أعرف آخد هدنة.. آخد هدنة أستوعب كل حاجة حصلت لي مؤخرًا واخد حقي ومساحتي إني أزعل وأفكر وأغضب وأخاف وأبان خايفة عادي!
عندي عشم إن الشهر دا يعدي وزي السنة اللي فاتت ما كانت بدايتها صعبة وصادمة أقدر أكون كويسة بعد كده بشكل يدهشني أنا شخصيا.. عشمي في ربنا كبير يبرد نار قلبي ويرد لي حقي ويآمن روعي يارب
ليست هناك تعليقات:
إرسال تعليق
Say something...