في وثائقيات الجريمة الأجنبية لفت نظري حاجة بتحصل في قضايا كتير. هي صفقة الإقرار بالذنب. اللي بيخففوا العقوبة فيها مقابل إن المتهم يعترف بالجريمة. معرفش قانونيًا دا بيبقى عشان إيه أو شروطه وظروفه إيه، بس بتفهم أسباب الشرطة إنه بكده بيوفر مجهود ووقت ونفقات وبيقصر عليهم المسافات باعترافه بالجريمة.
من ناحية تانية بيريح شوية المجني عليه لو كان عايش أو لو مابقاش موجود بيريح شوية أهله.
استوقفتني مرة بس جريمة فيها واحد أنهى حياة واحدة وبنتها تقريبا بطريقة بشعة جدا. وأهل الضحايا كانوا مستعدين يوافقوا على تخفيف العقوبة مقابل بس إنه يقول عمل كده ليه!
هو كان معترف بالجريمة أو كانت الأدلة كلها ضده بس ما قالش دوافعه ولا تفاصيلها كانت إيه. من وقتها وأنا كتير جدًا بفكر هل فعلاً معرفة الدوافع والأسباب ممكن تريح أكتر من إنه يتعاقب كفاية على جريمته؟ هل لو عرفنا دوافع اللي آذونا وأسبابهم دا هيريحنا فعلاً؟ هو الأهم السبب ولا الضرر اللي وقع فعلاً بغض النظر عن أسبابه ودوافعه؟
فكرت كتير طب ما هو ممكن يعمل الصفقة ويقول أي سبب! هل اللي هيقوله هيريحهم فعلاً ويصدقوا إن دا السبب؟ طب مش يمكن السبب في حد ذاته يكون مأساة تانية؟
من وقت للتاني بلاقي نفسي واقفة قدام السؤال دا ومش عارفة إجابة حقيقي. هل نعيم الجهل فعلاً نعيم؟
مسلسل Missing You جدد أسئلتي دي. البطلة اللي حياتها اتقلبت فجأة لقت نفسها فجأة قدام معضلتين. علامتين استفهام كبار مش قادرة تتجاوزهم وتكمل حياتها طبيعي بعدهم. واحدة منهم شكلها متجاوبة. قاتل أبوها اعترف بجريمته وقال إنه هو اللي قتله بس عمره ما اعترف قتله ليه.
التانية مالهاش إجابة: ليه حبيبها اللي قلبها مصدق جدًا إنه بيحبها من كل قلبه اختفى من حياتها فجأة. اختفى من الحياة كلها بشكل عام وسابها في عز ما هي محتاجاه .
سنين من عمرها فضلت بتطارد الإجابة اللي متخيلة إنها هتريحها، لكن الإجابة بتفتح لها باب على الجحيم وبتكتشف مع كل خطوة إنها كانت عايشة في نعيم الجهل. الحقيقة اسوأ من كوابيسها أصلاً. مخطرتش في بالها لحظة. الحياة اللي عاشتها كان جزء كبير منها كذبة كبيرة. كل الحقايق مرتبكة قدامها. ماتعرفش إيه اللي حقيقي وإيه اللي كذب. قلبها ما بقتش قادرة تصدقه أوي وحتى الحاجات اللي اسمها "حقايق" مش قادرة تصدقها!
حركة صوابعها الخفيفة تجاهه في آخر المسلسل خلتني اتساءل، هل فعلاً الفهم مريح؟ هل هتقدر تتجاوز دلوقتي عشان فهمت وعرفت الحقيقة رغم قبحها؟
ليست هناك تعليقات:
إرسال تعليق
Say something...